യാത്രാമൊഴി
ഇത്രനാള് രാപ്പാര്ത്ത അഗ്നികുടീരത്തെ
വിട്ടു ഞാന് പോകുന്നു ഓമലാളെ
നോവുന്ന ഹൃത്തടം തേങ്ങുന്ന മാനസം
തോരാത്ത കണ്ണുമായി പോയ്മറയാം
വേലിക്കല് നിന്നെന്നെ മാടിവിളിക്കുന്ന
തുമ്പപ്പൂ മലരിനും യാത്ര ചൊല്ലാം
മുറ്റത്ത് പൂക്കുന്ന മുക്കുറ്റിപ്പെണ്ണിന്റെ
കവിളത്ത് ഞാനൊരു മുദ്രചാര്ത്താം
മാറത്ത് ചാഞ്ഞെന്റെ ദേഹത്ത് വീഴുന്ന
കണ്ണുനീര്മുത്തുകള് ബാക്കിവെയ്ക്കാം
കാലം പറഞ്ഞതും ചൊല്ലാന് മറന്നതും
ഒരുപോലെ ഈ നെഞ്ചില് ചേര്ത്ത് വെയ്ക്കാം


